(تقديم)
ملك ولّا كتابة …
ملك ولّا كتابة …
طب اختار الملك …
ولّا اختار الكتابة ؟
ملك ولّا كتابة
تعدل الملك
و تصرف الكآبة … ؟
ملك ولّا كتابة …
تعجل في الشروق
تداوي الشوق بشوق
و توصف الصبابة … ؟
ملك ولّا كتابة …
ملك ولّا كتابة …
(النص)
صعبة الكتابة
و الكلام ما أصعبه
و العقل داير بالحروف على المعاني
تتعب الحروف
و تبعد المعاني
و القلم
يعرف طريق الشخبطة ….
- مين اللي قال الشعر احنا بنكتبه ؟
و مين حكم …
إن القصايد ملكنا ؟
أسلسل في العبارة
أقول هي العبارة
أدور ع القصيدة
ألقى القصيدة ضاعت
و القى القضية ماعت
و القى الكلام عبيط …
-
فين الغنا ساعة الفرح
فين البكا ساعة الألم
فين الكتابة …
فين أنا؟
حبيبتي ساكنة عند طرف البال
و ساعات بتبقى هي كل البال
و منين غنا … و لّا منين موال
و قدرنا إنه كل وصل محال
-
علشان أقول كلام يوصل المعاني
لازم أكون أساسا فاهم المعاني … !
الظلم شانه عالي
و العدل سوقه خاب
ف قفل ع الحقيقة
و افتح للكدب باب
و بيع في اللي تطوله
و بيع في اللي شاريك
لا تعتل هم بكرة
أو تسأل عن ماضيك
و ان كنت غاوي عِـندك
و ناوي ع النكد
فافهم إنه وجودك
كمالة في العدد ….
-
شوف كام قصيدة قلتهم في كلمتين
و كام قصيدة ما قلتهمش ….
الدنيا هيه هيه
ألفين شاعر يهاتوا
و الدنيا هيه هيه
و الناس تقرا القصايد
و كأنها جرايد
و تبات و تصحى تاني
و الدنيا هيه هيه
و نمدح في اللي كاتب
و نمدح في اللي قاري
و ما بين كاتب و قاري
الدنيا هيه هيه …
-
موش عارف اكتب من زمن
اكمني خايف م الحقيقة
و آديني راجع اكتب
من خوفي م الحقيقة
و خوفي م العبث ..
(تسليم)
ملك ولّا كتابة
ملك ولّا كتابة
يا رامي لا ترمي عالي
و لا تسألني اختياري
ملك ولّا كتابة
حتختارني الكتابة … !
عبد الحميد طه
1-3-2008
